Eph 5 | TLF | STEP | (Jon 3:18-21, 8:12, Rom 12:9-21, Kol 3:5-17, 1 Jon 1:5-10, 2:7-11) Ibo God ilami man utamta, iyo ipmi aget kup kobesa kale, imi kuguup kanum-nuuba ulutap ke ipkil kanu-bom bom-bilipta o ageta ko.

Ephesians 5

Fol imi bogo-nala, “Ibo utama-bomta ilagenin diim kugol kuguup tambal uta kup waafu-bilipta o,” agesa uta ko

(Jon 3:18-21, 8:12, Rom 12:9-21, Kol 3:5-17, 1 Jon 1:5-10, 2:7-11)

1 Ibo God ilami man utamta, iyo ipmi aget kup kobesa kale, imi kuguup kanum-nuuba ulutap ke ipkil kanu-bom bom-bilipta o ageta ko. 2 Krais iyo, numi ilak uyo do dong dogobelan o age-nalata, tinum bilip imi, God imi mufekmufek kobelum o age fuulip tang tambal kuun-bulu ku-nala, “Tambaliim o,” agan-nuuba ulutap ke-nalata, imi dam uyo God imi kobelata, waasi iyo tebe angkolipta, yagal tebe imi sinik iyo God imi dobe no ke-nalata, kaanata, God yagal du-nalata, “Tambaliim o,” age-se kale, ulutap kale, ipkil mungkup ipkumal imi ilak uyo duga-bom dong daga-e-bom ke-bom-nilipta o ageta ko.

3 Kale minte ibo God imi unang tinum kale, ipmi sa daga-bom kayaam ilatap keman-temip min, mufekmufek soyaap kelupta o agan-kalon-temip uyo felepmuta, kanuman-temaalip kale minte, maak uyo, ibo intap intap kuguup umaak, “Bo tambal o,” age-nilip kanu-bilip ipkumal iyo itam-nilipta, boyo sa dagamin kuguup ulutap kalaa agelip umdii, ipmi kanuman-temip boyo felepman-temaalu kale, ibo kanu-bilipta, ipkumal iyo kanupmin aget uyo fugunin ba ko. 4 Kale ipmi fitom weng bagaman-temip min, bisop weng bagaman-temip min, tinol faga-bom weng mafak bagaman-temip uyo felepmuta, kanuman-temaalip kale, ipmi God imi, “Suguul o,” agan-kalon-temip uta fen felepmuta, kanuman-temip ko. 5 Kale ibo utamin. Waantap ita sa daga-bom kayaam ilatap kema min, mufekmufek soyaap kelita o agan-kala umdii, beyo yak Krais imi diim feba-nalata, tam God imi daam tem uyo tam unon-temaala binim. Kale tinum iyo, mufekmufek soyaap kelita o agan-kala umdii, kanupmin aget fugunin boyo mitam-nulu e, God imi aget fugun-be uyo kupkan kebeluta, God imi aget uyo atin iluman kupkalan-tema ko.

6 Kale unang tinum iyo God imi weng uyo kwaasule-bom yang fengmin sang ko bagan-bii boyo fengamip umdii, bomi kalan uta fen God iyo olsak tebepmuta, kaal fuyap uyo kupka-eman-tema kale, ibo tinum bisop bagamin imi weng uyo tinangkulip imdep yang kuguup mafak mafak tem uyo tilimin ba e minte, 7 kanupmin tinum bilip iyo yang mep so tamap iso tiinemin ba no ko. 8 Siin uyo ipmi aget tem uyo miliil mo-buluta, kuguup mafak mafak uyo kanu-bii-silip kale, am kaa daan-suu koyo, te tam Kamogim Yesus imi unang tinum ke-nilip e, ipmi aget tem uyo ilagen-suu kale, ilagenamin bota unang tinum iyo dong dogobelu kuguup tambal tol kup tebesu uta kup waafunamin kale, ibo tinum ilagenin diim albip imi kuguup kanubip ulutap ke-bom-nilipta o ageta kale, 10 ibo fomtuup fen-bom-nilipta, utamipta e, Bisel God imi weng bogobe-nala, “Bota kuguup tambal o,” agan-be uyo kulbu kalaa age-nilipta, bota waafu-bom-bilipta o ageta ko. 11 Bilip imi kanumin kanumin mufekmufek kanum-nuubip boyo mililanin kuguup ko age kuguup mafak kale, imi kuguup boyo dogobeta ipkumal iyo dong dogopmomu binim kale, mungkup bilip imi kuguup bantap kanum-nuubip boyo fen kuguup mafak kale, kanube bomi sang kem bogolan-temap uyo fitom tebepkelan-temu kale, ibo iso yakyak kem tiinemin ba kale, kuguup tambal uta kup waafu-bom-bilipta, ipmi kuguup uyo ilagen-nuluta, tebe bilip imi mililanin kuguup uyo kupkem daabeluta, kek kek iyo utamipta e, bo kuguup mafak kalaa agelin o ageta kale, 13 God ilami yogon uyo kefolata, kuguup boyo kemanuta, unang tinum iyo utamipta e, kuguup boyo kanupmin kalaa age utaman-temip kale, 14 Kristen nuyo bomi sang uta baga-bom do weng koyo bogo-nulup e, “Kabo yuut kapmi agaal unbap ko age kapmi kaanbap uyo kupkaa fen mitam tigi molapta, Krais iyo tebe kamdep yang ilami ilagenin diim daalan-tema o,” agan-nuubup ko.

15 Ibo ipmi ilagenin diim albip bomi aget uyo fugun-bom-nilipta, ipmi tiinemin tonamin uyo tele utama-bom-nilip e minte, ipmi kuguup uyo tinum utamsaalip binim imi kuguup kanubip ulutap uyo kemin ba kale, tinum utamsip imi kuguup kanubip ulutap uta ke-bom kanumin o ageta ko. 16 Kale kamano koyo unang tinum kwiin tagang iyo kuguup mafak uyo waafuu kwep mitam abu kale, kanube ibo utamipta, dok kota numi ipkumal kuguup tambal kobelan agin so umi am uyo daanu kalaa agelip umdii, kupkalip bisop te yang iinemin ba kale, kanumin uta kup ko. 17 Kale kanube amon amon nin kuguup uyo waafunamin ba kale, kup-kugu utamipta, Bisel God imi ipmi bogobe-nala, “Bota kanumin o,” agan-be uyo kulbu kalaa age utam-nilipta, bo kanumin o ageta ko.

18 Ibo ok mafak uyo unan-bom ilum ilum ke-bom ipmi tonamin uyo kufak dagamin ba kale, ibo God imi Sinik iyo dupkalip yagal tebe ipmi aget fugunin min, sinik min uyo fomtuup tiin molata, tambaliim kup bom-bilipta o ageta kale, 19 ipkumal Kristen sino weng bagamip uyo, Baibel umi aseng so Yesus imi deng tebe-bom kwaamin aseng so God imi Sinik tebe aseng kobe-se aseng so uyo kwaa-bom-nilipta o ageta kale, Bisel imi deng uyo tebe-bom imi aseng uyo kwaa-bom-nilipta o ageta ko. 20 Kale ibo, “Nuyo Kamogim Yesus Krais imi unang tinum kesup o,” agan-bom suun kup mufekmufek alugum umi sang uyo Aatum God iyo baga-e-bom, “Misam o,” agan-bom no ke-bomta bom-bilipta o ageta ko.

Unang tinum digin, tinum unang digin imi sang uta ko

(1 Kor 7:1-5, Kol 3:18-19, 1 Tes 4:3-7, Tat 2:3-5, Hib 13:4, 1 Fit 3:1-7)

21 Ibo aget fugunolipta, Krais beyo numi Kamogim ita kalaa age-nilipta, ilami weng uyo tinangkan-nuubip kale, ibo ipkumal Kristen imi weng ugol mungkup tinangku-nilipta, imi afak tem kugol bom-nilipta o ageta ko.

22 Kale unang tinum digin ibaa. Ipmi Kamogim Krais imi dupkalip ipmi tiin mola ilami weng kup tinangkan-bomip ulutap ke imagal imi weng kup tinangka-bom-nilipta o ageta kale, 23 kanube Krais beyo ilami dam ko age ilami unang tinum numi ilim uyo bo-nala e, numi dubom ke-se kale, mungkup ulutap unang tinum digin ibo imagal bilip iyo ipmi dubom no kale, 24 ibo Kristen unang tinum numi Krais imi dupkalup numi tiin mola ilami weng kup tinangkan-bomup ulutap ke atin ki imagal imi weng kup tinangka-bom-nilipta o ageta ko.

25 Minte tinum unang digin ibaa. Ibo Krais imi unang tinum numi aget kup ugel kala-nala ilami kaal sigim ke-nala numi ilim bo-se ulutap ke kalelal imi ilak kup do tambaliim tiin mo-bom-nilipta o ageta kale, 26 ilami kaal sigim ke-se bomi magam uyo kulbu kale, Krais imi aget fugunin uyo, “Nimi ilak dolan-temip unang tinum iyo weng tambal uyo kobe-nili e, diing daa imoli mitam tambalanipta, kulep meng nalami mit kun diim to itamita e, kalip iyo unang kapket ilitap ke alugum mafak binim, atin tambaliim kalaa age-nilita, bilip iyo kululi yak God imi sagaal ban diim abelipta, ilami man aligaap kelin o,” age-nalata, Krais iyo ilami kaal sigim ke-se ko. 28 Kale ulutap kale, tinum ibo ilipmi kaal umi ilak do tambaliim tiin mobip ulutap ke ipmi kalelal imi ilak uyo do telelemin o ageta ko. Kale tinum so ilami kalel so agam iyo maagup kale, tinum iyo ilami kalel umi ilak do tambaliim tiin mola umdii, bomi tem ku-tele beyo ilami kaal kuso tiin molan-tema kale, 29 tinum iyo maak ilami kaal aa dam aa uyo utafinon-nuubaala kale, ilami kaal umi ilak uyo do-bom ilami dam uyo unan-kalin uyo kupka-e-bom-nala e, tambaliim kup tiin mo-boma kale, ulutap kale, Krais yagal mungkup ilami dam ko age Kristen unang tinum nuyo tambaliim kup tiin mo-boma ko. 31 Kale God imi suuk kon tem weng uyo bomi sang uyo bogo-nulu e,

“Tam tinum iyo ogen aalap iyo imkaa yak kalel umi diim kal febala e, agam iyo te tam dam maagup ulutap kelan-temip o,”

agesu kale, 32 weng bomi magam uyo kwiin tagang kuta, nimi aget fugunin uyo, “Bomi magam maagup maak uyo Krais so ilami unang tinum so imi sang uta kam agesu o,” agan-bii kale minte, 33 alugum maagup maagup ipmi sang ugol mungkup kam agesu kale, tinum ibo ilipmi kaal umi ilak do tambaliim tiin mobip ulutap ke ipmi kalelal imi ilak uyo do telele-bilip e minte, kalelal igil imagal imi weng uta kup tinangka-bom no ke-bom-nilipta o ageta ko.